Bashkimi Evropian lançon projektin për të ndihmuar vendet e rajonit në luftën kundër krimit të organizuar

Bashkimi Evropian do të investojë 2.5 milionë euro në rajonin e Ballkanit për të luftuar krimin e organizuar. Projekti do të financohet nga Gjermania dhe Austria dhe ka në qendër të tij uljen e trafiqeve dhe të krimit të organizuar. Projekti ka pjesë të tij dhe Shqipërinë dhe nga një pjesë e shumës së vënë në dispozicion do të përfitojnë dhe institucionet ligjzbatuese shqiptare.

Marrëveshja

Shqipëria, Maqedonia, Kroacia, Bosnjë-Hercegovina , Mali i Zi, Serbia dhe Kosova do të jenë pjesë e projektit më të fundit të Bashkimit Evropian për të ulur nivelin e krimit të organizuar dhe trafiqeve në rajonin e Ballkanit. Ky investim i BE-së për gjithë rajonin është pjesë e projekteve të BE-së për të garantuar një nivel normal të Ballkanit. Ndikimi i këtij projekti do të ketë jo vetëm ulje të nivelit të krimit, por edhe përmirësimin e imazhit të Ballkanit Perëndimor, i cili nga raportet e mëparshme të BE-së është cilësuar si problematik. Edhe më parë vendet e BE-së i kanë kushtuar rëndësi të veçantë marrëveshjeve dhe luftës kundër trafiqeve dhe krimit të organizuar në vendet e Ballkanit.

Projektet e BE

Krijimi i një klime më të ashpër kundër trafiqeve dhe krimit të organizuar në vendet e Ballkanit është parë nga Bashkimi Evropian si parapërgatitje për hyrjen e këtyre vendeve në union. Të njohura për problematikat që kanë të bëjnë me respektimin e ligjit me institucionet ligjzbatuese, projektet në fjalë kanë si synim vendosjen e standardeve  moderne në luftën kundër narko trafikut dhe krimeve. Pjesë e këtyre projekteve kanë qenë dhe vendosja e sistemeve moderne të kontrollit kufitar  në vendin tonë. Strategjia e Bashkimit Evropian për Ballkanin është kthimi i këtij rajoni në një vend të sigurt dhe me nivele minimale të kriminalitetit. Nisma e Austrisë dhe Spanjës do të zbatohet për gjatë 30 muajve.

Masat e marra nga Shqipëria kundër trafiqeve

Ndryshe nga shumë vite më parë Shqipëria paraqet një tjetër situatë në lidhje me nivelin e trafiqeve. Vullneti politik por dhe një sërë ligjesh të miratuara për luftën ndaj krimit të organizuar kanë bërë që vendi të njohë një nivel shumë më të ulët se më parë. Moratoriumi i skafeve si dhe ligji më i fundit “Anti-mafia” janë disa prej akteve që kanë sanksionuar një betejë mjaft të ashpër ndaj fenomeneve negative. Gjithashtu mazhoranca ka futur në funksion dhe  Strategjinë Ndërsektoriale për Parandalimin dhe Luftën Kundër Korrupsionit dhe për Qeverisjen Transparente, për periudhën 2008-2013, për implementimin e së cilës Policia e Shtetit ka programuar detyra specifike për këtë periudhë dhe për vitet në vazhdim. Gjithashtu gjatë vitit që lamë pas është krijuar dhe Drejtoria Kundër Krimit Financiar në Departamentin për Hetimin e Krimeve. Ndërsa ekspertët e BE e kanë cilësuar  Shtetin Shqiptar si shembull suksesi për këtë luftë kundër krimit të organizuar. Po për këtë çështje nga Qeveria janë nënshkruar një sërë marrëveshjesh me shtetet fqinje si dhe me disa shtete që janë pjesë e Komunitetit Evropian. Në këtë plan janë nënshkruar marrëveshje me Letoninë, Çekinë, si dhe me shumicën e vendeve të Rajonit në  memorandumin e mbajtur në Romë, Itali, për mirëkuptim rreth bashkëpunimit në luftë kundër krimit të organizuar dhe krimeve të tjera të rënda.