Sekretari i Shtetit, Xhon Kerri, zhvilloi dje bisedime me shefen e politikës së jashtme të Bashkimit Europian, Kethrin Ashton. Zoti Kerri vlerësoi përpjekjet e saj në ndërmjetësimin e bisedimeve Kosovë-Serbi. “Dua ta përshëndes atë për përpjekjet e saj të shkëlqyera në Ballkan. Ajo është takuar me figurat kryesore të Serbisë dhe Kosovës. Ajo ka punuar me këmbëngulje për të përballuar sfidat që përbën afrimi i të dy palëve dhe zgjidhja e problemeve mes tyre”. Nga ana e saj, Baronesha Ashton tha se nuk është e rastit që deshi të takohej me Sekretarin Kerri, para takimit të javës së ardhshme Kosovë-Serbi. “Unë kam pjesën më të rëndësishme të dialogut Kosovë-Serbi javën e ardhshme, kur kryeministrat e të dy vendeve do të takohen për dy ditë. Shtetet e Bashkuara janë një partner shumë i çmuar në këtë përpjekje”. Kryeministrat e Kosovës dhe Serbisë, Hashim Thaçi dhe Ivica Daçiç, pritet të takohen më 19 dhe 20 shkurt në Bruksel për të diskutuar situatën në veri dhe rrugët e shpërbërjes, apo transformimit të strukturave të mbështetura nga Beogradi.

NEWBORN, monument falënderimi për shtetet që njohën Kosovën

Kompania Ogilvy/Karrota, që realizoi monumentin NEWBORN për Ditën e Shpalljes së Pavarësisë së Kosovës, më 17 shkurt 2008, për të cilën i fitoi shumë çmime ndërkombëtare në lëmin e dizajnit, përfshirë edhe çmimin më prestigjioz në botë, ‘Luanin e Artë’ në Cannes, nëpërmjet rrjeteve sociale mbrëmë u bëri thirrje qytetarëve që t’i bashkëngjiten për ta kthyer në monument me flamujt e shteteve që e kanë njohur pavarësinë e Kosovës. Aksioni do të nisë të shtunën, më 16 shkurt, nga ora 10:00 në mëngjes, në mënyrë që 5-vjetori i pavarësisë të pritet me pamje të re. Ky propozim nga autori i monumentit, Fisnik Ismaili, që të lyhet në këtë mënyrë dhe t’i ndryshojë pamja më 17 shkurt të çdo viti, i është paraqitur si kërkesë Qeverisë së Kosovës dhe Komunës së Prishtinës qysh nga përvjetori i parë i pavarësisë, më 2009, por i është refuzuar vazhdimisht çdo vit, përfshirë edhe sivjet për përvjetorin, pa ndonjë arsye të veçantë, por gjithherë me prapavijë politike. Sivjet Komisioni për organizimin e manifestimit të 5-vjetorit të Pavarësisë, i udhëhequr nga zyrtarë të Qeverisë së Kosovës, mori vendim që ta ngjyroste monumentin NEWBORN sërish me ngjyrë të verdhë (dhe jo sikur e verdha origjinale), pa u konsultuar asnjëherë me autorin për qëllimin, simbolikën apo mirëmbajtjen e mirëfilltë të kësaj vepre, duke i mbuluar nënshkrimet e shumta të qytetarëve pa asnjë lloj sqarimi, dhe duke mos i përfillur të drejtat autoriale dhe implikimet legale që mund të shkaktojë ky veprim. Prandaj, si reagim ndaj kësaj shkeljeje të rëndë, jo vetëm ndaj të drejtave autoriale, por edhe shprehjes së lirë, Fisnik Ismaili mori vendimin për ta ngjyrosur monumentin ashtu si është menduar që nga përvjetori i parë, pa miratimin e autoriteteve zyrtare, duke gjetur përkrahje të madhe nga qytetarët, të cilët do t’i bashkëngjiten kësaj nisme, që po vërehet nga reagimi masiv në Facebook dhe Twitter. Ismaili sqaron se NEWBORN është një vepër, e cila i shërben secilit qytetar për t’u shprehur në të, në çfarëdo mënyre, qoftë edhe duke e ngjyrosur me ngjyra të tjera. Kështu, ngjyrosja me flamujt e shteteve që pranuan pavarësinë e Kosovës simbolizon mirënjohjen e qytetarëve ndaj këtyre vendeve, dhe njëherësh shërben si porosi, duke kërkuar nga shtetet e tjera të na njohin sa më shpejt. Ai ka paralajmëruar se sot gjatë ditës do të njoftojë organet e rendit për këtë aktivitet.

Ish-presidenti i Kroacisë

Stipe Mesiç: Kosova të realizojë sa më shpejt pavarësinë e saj

Nuk mund të lejohet kjo gjendje, praktikisht, gjysmë-lufte në kufirin me Kosovën. Kjo i bën dëm edhe Serbisë dhe Kosovës, thotë Stipe Mesiç, ish-president i Kroacisë. Mesiç theksoi se kur Jugosllavia humbi faktorët integral është dashur të ndodhë një marrëveshje politike, të kërkohet një model i ri. “Unë kam propozuar një konfederatë për një afat të caktuar, tri deri në pesë vjet, të cilën do ta rishikonim – nëse kjo do të funksiononte atëherë mund të qëndronte konfederata si zgjidhje, kurse nëse nuk funksionon – atëherë secili vazhdonte rrugën vet, dhe pa luftëra. Në një situatë të tillë, edhe Kosova mund të pavarësohej, si të gjitha elementet e tjera të ish-Jugosllavisë. Por, fatkeqësisht, Millosheviçi nuk pranoi këtë ofertë, sepse dëshironte që të krijojë ‘Serbinë e Madhe’”, tha Mesiç në intervistën dhënë Radios Evropa e Lirë. Lidhur me propozimin për zgjidhjen e raporteve të Serbisë me Kosovën, sipas modelit të dy Gjermanive, në kohën e Luftës, Mesiç tha se “nuk e di se përse është pritur kaq gjatë, kur ishte e qartë se njëlloj bashkësie e re mes Kosovës dhe Serbisë, më nuk është e mundur”. Sipas Mesiçit, “bashkësia ndërkombëtare është dashur që të bëjë gjithçka që Kosova të realizojë sa më shpejt pavarësinë e saj, kurse Serbia nuk do të duhej ta njihte Kosovën, dhe gjërat do të funksiononin”. Por, shtoi Mesiç, në rajon duhet të bashkëpunuar, pavarësisht nëse Serbia ka njohur apo jo Kosovën. “Ne duhet të bashkëpunojmë, kurse populli i Kosovës duhet të ketë mundësinë e lëvizjes së lirë, të mallit dhe kapitalit. Kosova mund të funksionojë vetëm atëherë kur ka në dispozicion resurset e saj, dhe është e barabartë me vendet e tjera të pavarura. Kosova ka resurse, por nëse ajo mbahet e mbyllur, dhe populli i Kosovës nuk mund të udhëtojë jashtë, atëherë Kosova është e dënuar në dështim”, tha ish-presidenti kroat.

Somarjo