Sekretari i Përgjithshëm i Lëvizjes Socialiste për Integrim, Luan Rama, deklaroi dje se prioriteti i LSI-së në sesionin e ri parlamentar është tryeza e Reformës Zgjedhore. Rama tha se nisja e sezonit të ri politik e vë natyrshëm politikën shqiptare në mënyrë të veçantë Kuvendin e Shqipërisë përballë përgjegjësisë për të realizuar dhe përmbushur disa detyra të rëndësishme, që kanë të bëjnë me zhvillimin apo ecurinë e mëtejshme të vendit në rrugën e pakthyeshme të integrimit evropian. Ai thotë se LSI është e përgatitur për të nisur sesionin e ri politik me angazhim maksimal me dy drejtime, apo dy fronte kryesore, që janë zgjedhjet e drejtuesve të LSI për Tiranën dhe organizimi i tryezës për Reformën Zgjedhore. Në një intervistë dhënë për ATSH-në, Sekretari i Përgjithshëm i LSI-së, u shpreh se domosdoshmërisht duhet shkuar te reforma zgjedhore, te reflektimi në draftet që e përmirësojnë tërësinë e korpusit ligjor, mbi të cilat zhvillohen zgjedhjet të gjitha sensibiliteteve, prioriteteve, për të cilat është folur shumë, por në fakt është bërë shumë pak, ose s’është bërë asgjë deri tani.

Cila do të jetë axhenda e LSI-së për sesionin e ri politik dhe parlamentar? Cilat do të jenë prioritetet?

Natyrisht, që ne jemi të përgatitur për të nisur sesionin e ri politik me angazhim maksimal me dy drejtime apo dy fronte kryesore.

Së pari, kemi nisur një proces, i cili me fillimin e shtatorit intensifikohet dhe ridimensionohet më tej, që ka të bëjë me riorganizimin dhe rritjen e efeciencës së veprimit politik dhe organizativ të strukturave të LSI-së në të gjithë vendin. Po zhvillojmë fushatën për zgjedhjen e drejtuesve të LSI-së në Tiranë fillimisht për t’u shtrirë pastaj dhe në qytete dhe në rrethe të tjera.

Po merremi me riorganizmin dhe kompaktësimin e strukturës së LSI-së prej nivelit të organizatës deri te forumet drejtuese, për të mbërritur te një veprimtari më e organizuar dhe më e fokusuar e LSI në të gjitha nivelet në të gjithë vendin dhe, nga ana tjetër, mbetet e një rëndësie parësore roli dhe veprimi politik i LSI, si trupë parlamentare dhe si një faktor dhe aktor i rëndësishëm politik në jetën e vendit.

Me çeljen e sesionit të ri të Kuvendit, ne do të synojmë të arrijmë t’i ftojmë palët në tryezën e reformës zgjedhore, që është padyshim një prioritet që lidhet edhe me tërësinë e çështjeve që kanë të bëjnë me zgjedhjet përgjithësisht, nga njëra anë, dhe nga ana tjetër për të ndikuar që vendimmarrja e parlamentit në mënyrë të veçantë ligjet që shkojnë në Kuvend të përgatitura nga qeveria, të përmbajnë edhe frymën e programit politik dhe elektoral të LSI, në mënyrë të veçantë ato që kanë të bëjnë me dimensionin social dhe me një qëndrim më pranë njerëzve në nevojë, me politika sociale që stimulojnë punësimin në mënyrë të veçantë e që rrisin efektivitetin e qeverisjes në përputhje me kredon tonë politike dhe qeverisëse për t’u ofruar njerëzve një qeverisje më të mirë.

Pa dyshim, që në këto dy drejtime, themelore dhe me këto dy prioritete, ne do të bëjmë të mundur që jo vetëm roli dhe angazhimi i LSI-së në jetën politike të jetë më evident, por edhe më produktiv dhe që të çojë pastaj natyrshëm te faktorizimi i LSI-së jo sepse kështu duam apo mendojmë ne, por sepse përmes këtij angazhimi të bëjmë të mundur jo vetëm rikonfirmimin e asaj mbështetjeje që LSI ka, por edhe zgjerimin e bazës së mbështetjes dhe të njerëzve që e votojnë LSI.

Ju keni deklaruar se LSI ka gati një projekt-draft për sa i përket reformimit të kodit zgjedhor. Mund të na thoni se çfarë propozon realisht LSI-ja për ndryshimin e ligjit të ri elektoral?

Ne kemi kohë që kemi vënë në punë një komision të posaçëm që merret çështjet e reformës zgjedhore. Pavarësisht se është komision që funksionon në përbërje të strukturave të LSI-së, në të bëjnë pjesë ekspertë juristë, konstitucionalistë dhe në mënyrë të veçantë më të profilizuar, specialistë të çështjeve zgjedhore, me të cilët kemi mundur të bëjmë një revizionim apo rishikim të kodit aktual, duke reflektuar në draftet tona edhe ato çka janë në thelb vërejtjet apo sugjerimet të bëra nga OSBE/ODHIR veçanërisht.

Natyrisht, këtë punë ne e kemi zgjeruar më tej, duke u konsultuar dhe bashkëpunuar edhe me trupat të tjera, në mënyrë të veçantë me disa organizma joqeveritarë, të cilët merren drejtpërdrejt me zgjedhjet, me shoqata, apo fondacione që punojnë me procesin zgjedhor, për të mbërritur te një mendim më i konsultuar, më i pjekur apo te një mendim që përmblidhet te një emërues i përbashkët për disa çështje parimore.

Pa dashur të ekspozoj detaje konkrete, të cilat ne i kemi të qarta tashmë, dëshiroj të theksoj që ne nuk artikulojmë çështje konkrete se çfarë synojmë të përmirësohet, sepse nuk duam të paragjykojmë apo të sugjestionojmë tryezën e mundshme të një reforme zgjedhore, sepse është e domosdoshme dhe është logjike që, pikë së pari, për të mbërritur te tryeza e reformës zgjedhore të jenë të gatshëm të gjitha aktorët politikë parlamentarë, çka do të thotë që në mënyrë të drejtpërdrejtë këtë vullnet dhe këtë angazhim ta shprehë realisht duke marrë pjesë edhe opozita, që përfaqëson PS.

Për këtë shkak, ne mbetemi të hapur të ofrojmë alternativën tonë, por edhe të kontribuojmë të diskutojmë, apo të ballafaqojmë qëndrimet dhe gjykimet se çfarë mund të ofrojnë partitë e tjera.

Për këtë shkak, ne nuk artikulojmë detaje, por jemi të përgatitur që përballë çdo opsioni, mendimi apo alternative të mund të jemi të gatshëm të kontribuojmë pozitivisht. Thelbi apo ajo çfarë ne synojmë është, së pari, të kuptojnë të gjithë aktorët politikë parlamentar dhe joparlamentar domosdoshmërinë e reformës, domosdoshmërinë që reforma të jetë gjithëpërfshirëse dhe që reforma të jetë transparente, për sytë e publikut dhe që pas kësaj të mund të shkojmë te një kompleks aktesh ligjore dhe nënligjore, mbi të cilat zhvillohen zgjedhjet, që të mund të shmangim çdo hapësirë, apo të mos lejojmë asnjë hapësirë për të pasur nesër pretekst cilido për të kontestuar, për të mos njohur, apo për të mos pranuar zgjedhjet. Sugjerimet e OSBE/ODHIR janë konkrete, janë traseja mbi të cilën duhet ecur dhe ne jemi të gatshëm dhe presim që këtë gatishmëri ta ofrojnë edhe të tjerët.

Megjithatë, kodi aktual penalizoi partitë e vogla. Cili është qëndrimi i LSI ndaj këtij sistemi?

LSI-ja ka qenë dhe mbetet e hapur për ta riparë sistemin, për ta përmirësuar atë, por nga ana tjetër, nëse nuk mbërrijmë te një sistem më korrekt dhe më i konsoliduar, natyrisht, që ne nuk i trembemi as sistemit ekzistues, sepse duke qenë aktualisht forca e tretë politike në vend, ne edhe për shkak të këtij sistemi kemi disa benefice, të cilat na bëjnë të jemi pjesë e procesit tashmë dhe jo jashtë procesit, siç ka qenë në zgjedhjet e 2009. Duke qenë aktor pjesëmarrës në proces, natyrisht që ne nuk do të lejojmë më askënd të bëjë atë që bëri në 2009 me votën që iu dha LSI, apo me vullnetin e qytetarëve që mbështetën dhe votuan LSI-në.

Por, kur flasim për reformë zgjedhore, ne nuk nisemi nga interesi thjesht dhe vetëm i LSI-së. Ne nisemi nga domosdoshmëria që reforma t’i shërbejë konsolidimit të sistemit zgjedhor, forcimit të tij, të garantojë përputhshmëri të plotë mes votës dhe nivelit të përfaqësimit, por edhe transparencë që çdo qytetar të dijë ku shkon vota e tij dhe se si administrohet vota e tij në të mirë të qeverisjes së vendit.

Por, a do të vazhdojë të këmbëngul LSI-ja për anëtarin në KQZ?

Nuk është kjo çështja më thelbësore, ne do të këmbëngulim për të mbërritur te procesi i reformimit të sistemit për shumë çështje që janë më prioritare dhe të rëndësishme sesa fakti kë apo kush e ka një përfaqësues në KQZ. Mundësia për të përmirësuar kodin dhe gjithçka lidhet me zgjedhjet, padyshim na çon edhe te domosdoshmëria për të parë edhe detaje të kësaj natyre, që ka të bëjë edhe me pyetjen që bëtë ju.