Kili ka ditur të shfrytëzojë të vetmen pakujdesi të pandreqshme të Hondurasit, për të shënuar atë gol që, si përfundim, rezultoi vendimtar në duelin midis dy skuadrave, që hapi grupin H të Botërorit. Faktikisht ishte një sfidë ndryshe nga ato ndeshjet e tjera të deritanishme të luajtura në tokën afrikane, ku kishin mbizotëruar ritmet e ngadalta. Këtë herë ishte më në fund një ndeshje e vërtetë futbolli, pa shumë taktikë, por me tepër vrap dhe skuadrat që janë përballur hapur. Ndonëse, ashtu si në takimet e tjera, vazhdoi avazi i golave me pikatore. E duke parë diferencën teknike midis dy ekipeve, ishte e natyrshme që mbizotërues të ishte Kili, edhe sepse Hondurasi u detyrua të heqë dorë nga lojtari më i mirë, David Suazo, për probleme fizike. Nga ana e kilianëve, Sanchez e Valdivia kanë qenë vërtet të papërmbajtshëm në krahë dhe kështu amerikano-jugorët kanë qenë ata që krijuan rastet më të mira të lojës. Pikërisht atëherë kur fraksioni i parë duhet të mbyllej 0-0, një pozicion jashtë loje i gabuar i mbrojtjes hondurase i dha mundësinë Islas të hedhë një top joshës në zonën kundërshtare, aty ku Beausejour s’mund të gabonte. Një avantazh i merituar, që ka zgjatur deri në minutën 93, atëherë kur gjyqtari i takimit vërshëlleu për fundin. Në këtë mënyrë, kilianët kanë marrë tri pikët e para në këtë Botëror dhe gëzojnë kryesimin e grupit H, së bashku me Zvicrën.