Zv. Kryeministrit dhe ministri i Punëve të Jashtme, z. Ilir Meta, uroi të gjithë qytetarët dhe autoritetet e Kosovës për njohjen e 70-të të realizuar dhe konfirmuar dje nga ministri i Jashtëm i Hondurasit, çka përbën një hap tepër pozitiv pas opinionit këshillimor të Gjykatës Ndërkombëtare të Drejtësisë. Në linjë telefonike për televizionin “Top Channel”, Meta shpreh bindjen se ky vendim do të ndiqet edhe nga një zinxhir njohjesh të tjera, të cilat forcojnë akoma më tej pozitën ndërkombëtare të Kosovës, pas Opinionit të dhënë nga GJND, por njëkohësisht janë një mesazh shumë i qartë edhe për politikën e Serbisë, për lidershipin e Serbisë, që të tërhiqen nga qëndrime dhe iniciativa të njëanshme, siç është praktikisht edhe rezoluta e paraqitur prej tyre në Asamblenë e Përgjithshme. Numri një i diplomacisë shqiptare shtoi se është e qartë se Kosova si shtet i pavarur ka gjithë legjitimitetin e duhur dhe e gjithë bota demokratike po shkon drejt konsolidimit dhe përfundimit të këtij procesi, i cili natyrisht do të jetë i lidhur me ditën kur Kosova do të ketë vendin e saj në OKB.

Çfarë domethënie ka kjo njohje e re, duke parë edhe faktin që pas dy javësh zhvillon punimet Asambleja e Kombeve të Bashkuara, e cila do të diskutojë edhe rezolutën serbe?

Jam shumë i kënaqur që nëpërmjet “Top Channel”, t’i uroj gjithë qytetarët e Kosovës dhe udhëheqësit e saj, për këtë njohje të re, por shumë kuptimplote bërë sot (dje) nga Hondurasi, e cila është jo vetëm e 70-a, por është edhe e para pas Opinionit Këshillimor të Gjykatës Ndërkombëtare të Drejtësisë dhe që jam i sigurt që çel siparin edhe për shume njohje të tjera, që do vijojnë pikërisht pas studimit që vendet e interesuara, i kanë bërë këtij Opinioni tepër pozitiv për pavarësinë e Kosovës. Unë jam shumë i kënaqur që premtimin që bëri dje Presidenti i Hondurasit, z. Lobo, e konkretizoi në më pak se 24 orë, çka tregon qartë se, ashtu sikurse Hondurasi, edhe vende të tjera janë në një proces të afirmimit të njohjes për Kosovën, pas vendimit të GJND-së. Kuptohet që ky vendim i menjëhershëm i Hondurasit është një hap shumë i rëndësishëm psikologjik përpara, i cili jam shumë i bindur se do të pasohet nga njohje të tjera, pasi edhe gjatë takimeve që kam zhvilluar në vende të tjera të Amerikës Qendrore, por edhe në Parlamentin e Amerikës Qendrore, në Guatemalë, kam marrë siguri se Kosova, si shtet i ri, do të njihet në mënyrë të veçantë tani, pasi të gjitha vendet kanë studiuar Opinionin Këshillimor të GJND-së, ashtu sikurse kam marrë edhe garancinë për përkrahjen e çështjes së Kosovës për çdo debat të mundshëm, që do të mund të zhvillohet në Asamblenë e Përgjithshme të OKB-së.

Në këtë drejtim, unë jam shumë optimist, pas njohjes së sotme (djeshme) të formalizuar nga Hondurasi, që një proces zinxhir njohjesh do të vijojë në mënyrë të vazhdueshme, ashtu siç shpresoj se Serbia do t’i dëgjojë me përgjegjshmëri mesazhet nga Bashkimi Evropian dhe SHBA dhe të tërhiqet nga kjo iniciativë e njëanshme, e cila nuk i shërben absolutisht as forcimit të mëtejshëm të stabilitetit dhe paqes në rajonin tonë, por as perspektivës evropiane të vetë Serbisë. Kosova e pavarur është një realitet i pakthyeshëm, që po njihet dhe do të njihet nga shumë vende dhe e vetmja rrugë natyrisht mbetet dialogu për çështje të interesit të qytetarëve. Por, kurrsesi nuk mund të ketë dialog për statusin i cili nuk mund të negociohet, aq më tepër tani pas përforcimit që i ka bërë legjitimitetit të kësaj pavarësie Gjykata Ndërkombëtare e Drejtësisë.

Shqipëria është e angazhuar ta mbështesë Kosovën në OKB, çka u konfirmua edhe gjatë ditës së djeshme nga Kryeministri Berisha. Çfarë pritet të ndodhë nga sot deri në pritje të rezolutës në OKB ?

Pas përfundimit të kësaj vizite, unë do të jem në Nju-Jork dhe do të qëndroj atje kryesisht për këtë çështje deri në ditën që do të diskutohet dhe votohet projektrezoluta e propozuar në Asamblenë e Përgjithshme të OKB-së. Ndërkohë, që Shqipëria ka qenë dhe mbetet e angazhuar, përmes gjithë instancave më të larta, në një komunikim intensiv me gjithë drejtuesit e të gjithë vendeve që nuk e kanë njohur Kosovën, por edhe të atyre që e kanë njohur atë, në raport me sqarimin e fakteve negative që sjell kjo iniciativë e njëanshme, për fat të keq, e Serbisë në Asamblenë e Përgjithshme të OKB. Dhe kjo punë do të vijojë me intensitet shumë të lartë edhe në ditët e ardhshme. Ne do të dëshironim, dhe unë personalisht do të dëshiroja që Serbia, lidershipi i saj të heqë dorë nga kjo iniciativë e njëanshme, sikurse është rezoluta e paraqitur në Asamblenë e Përgjithshme për Kosovën. Do të donim të kishim një reflektim konstruktiv nga ana e Serbisë pas vendimit të GJND-së, të kërkuar pikërisht nga vetë Serbia dhe në këtë mënyrë të shkohej mundësisht me një tekst të përbashkët në radhë të parë nga vendet e BE-së, por edhe nga SHBA, në mënyrë që të gjitha zhvillimet në të ardhmen dhe të gjitha energjitë të orientohen në mënyrë konstruktive jo vetëm për të ardhmen e Kosovës, por njëkohësisht edhe për të ardhmen e Serbisë, e cila duhet të jetë në BE. Dhe që të jetë e tillë, ajo duhet të dëgjojë më shumë mesazhet e dhëna në mënyrë të qartë dhe konstruktive nga Brukseli.

Vlerësimi për turin diplomatik

Meta: Fazë e re bashkëpunimi

me vendet e Amerikës Qendrore

Zv. Kryeministri dhe ministri i Punëve të Jashtme, Ilir Meta, gjithashtu shprehu kënaqësinë për atë ç’ka arritur gjatë turit diplomatik në vendet e Amerikës Qendrore, në kuadrin e forcimit të bashkëpunimit midis Shqipërisë dhe këtyre vendeve. “Ndërkohë që kuptohet se forcimi i bashkëpunimit midis Shqipërisë dhe këtyre vendeve mendoj se ka hyrë në një fazë të re dhe shumë shpejt do të nënshkruajmë disa marrëveshje bilaterale me Hondurasin, me Salvadorin, me Guatemalën, por edhe me vendet e tjera të Amerikës Qendrore”, u shpreh Meta. Sipas tij, një takim shumë i rëndësishëm dhe pozitiv ka qenë ai në Parlamentin e Amerikës Qendrore, në Guatemala, ku Zv. Kryeministri dhe ministri i Punëve të Jashtme mori konfirmimin për forcimin e mëtejshëm të bashkëpunimit të Shqipërisë me Amerikën Qendrore, në nivel qeveritar dhe parlamentar. “Njëkohësisht kemi marrë përkrahjen për kandidaturën e përhershme të Shqipërisë si vëzhguese në Organizatën e Shteteve Amerikane (OAS)”, përfundoi z. Meta.